Op Vrydag 20 Mei het die Musiekdepartement MUSIEK
MOSAÏEK, hul eerste konsert vir 2022, aangebied. Om
dié naam gestand te doen, was daar 'n verskeidenheid
van style en instrumente om na te luister.
Die orkes, Forte, het die aand afgeskop en die gehoor
met 'n paar popmusiek items en 'n keurspel uit Pixar
films vermaak. Juf. Roodt het ook haar slag met die
viool in een van die orkesstukke getoon. Die soliste het
hierna gewys dat by Hoërskool Framesby uitstekende
afrigting in uiteenlopende instrumente aangebied word.
FANTASIA, die skoolkoor, het die aand afgesluit. Hulle
het die popkantate _Holy Moses_uitgevoer. Dit is 'n
reeks liedere wat die storie van Moses vertel.
Baie geluk aan elke deelnemer met 'n besondere aand.
Hierdie is definitief die begin van 'n welluidende
crescendo!