‘n Groep Framesby-atlete wat hulself die FRAMESBY YSTERS gedoop het, het verlede naweek aan die “Train Race” deelgeneem en as die wenners in die hoërskole-afdeling uit die stryd getree. Hulle is Damian Smith, Jason van der Watt, Chad van Rensburg, IP van der Merwe, Björn Ferreira en De-Leon Strydom. Almal het in die aflos verskillende afstande afgelê, terwyl IP 12,5 km op sy fiets moes aflê. Hierdie ysters het op hul eie inisiatief ingeskryf en in die proses Framesby se naam pragtig uitgedra. Baie geluk, manne!

Ons atlete berei tans baie hard voor vir die komende seisoen en Framesby bied binnekort ‘n atletiekkliniek aan waar van die beste afrigters in die provinsie ons atlete bietjie onder hande gaan neem.

Die Universiteit van Stellenbosch ken jaarliks erekleure toe aan studente wat uitsonderlk presteer. Hierdeur word erkenning verleen aan studente wat op akademiese-, sport- of kulturele gebied hulself op ‘n besondere wyse onderskei het. Hierdie toekennings is die hoogste toekennings wat deur die universiteit gemaak word en is net ‘n handjievol student beskore.

Ons is ongelooflik trots dat ons hoofdogter van 2012, Sorika Tait, onlangs hierdie besondere eer te beurt geval het. Sorika was op skool een van ons top akademiese presteerders. Sy studeer sedert 2013 medies aan die Universiteit van Stellenbosch en is tans in haar finale jaar.

Die toekenning wat aan Sorika gemaak is, is gebaseer op haar akademiese prestasie die afgelope vier jaar. Die eerste jaar van studie word nie hiervoor in ag geneem nie, en vanaf haar tweede tot vyfde jaar het Sorika elke jaar cum laude geslaag. Om ‘n uitdagende kursus soos medies jaarliks met onderskeiding te slaag is ‘n besondere prestasie.

Sorika het met hierdie prestasie voortgebou op die uitstekende prestasies wat ons oud-leerders reeds aan die US behaal het. Framesby is ongelooflik trots!