Ons het oor die afgelope veertig jaar daarin geslaag om 'n trotse rekord op akademiese, sport en kulturele gebied op te bou en ons glo dat ons steeds aan hierdie tradisie voortbou.

Framesby : Waar Potensiaal Verwesenlik Word..

Wat ’n belewenis om hierdie jaar, 2011, die pad met Framesby te kon stap.  Onuitwisbare herinneringe, met soveel suksesse op verskeie terreine.  Leerders wat die skool se magdom geleenthede aangegryp het om die beste daaruit vir hulself te haal.  Baie geluk aan hierdie leerders.  Dis julle wat ons skool ’n goeie naam gee en ons op die vlak plaas van ’n ware super skool!  My dank ook aan ons entoesiastiese personeel en ondersteunende ouers wat ’n daadwerklike verskil maak aan die prestasies en ontwikkeling van ons kinders.

Aan die einde van hierdie jaar word ’n baie groot persentasie leerders bevorder na die volgende Graad.  Dit span die kroon op volgehoue harde en deeglike werk  - baie geluk aan elkeen.  Daar is ook diegene wat nie die vereistes behaal het nie en wat volgende jaar hul Graad moet herhaal.  Elkeen moet hand in eie boesem steek en hulself afvra: “Wat was my bydrae tot die jaar se vordering” alvorens die skool, gerieflikheidshalwe, blameer word vir wanprestasie van leerders.

2012 sal afskop met die nastreef van voorafbepaalde doelwitte vir die jaar. Personeel sal streef na verbeterde werktrots by personeel en leerders, groter ouerbetrokkenheid, groter omgee vir leerders en die daarstel van verbeterde verhouding tussen personeel, ouer en kind, die nalaat van ’n verminderde koolstofspoor en “groener” omgewing en om die uitleef van Christelike beginsels in ons skool na nuwe hoogtes te neem.  Leerders moet gefokus word op akademie, selfdissipline, op hul eie persoonlike netheid (wat hare insluit), stiptelikheid en lojaliteit teenoor ons skool.

Ons wil Framesby toenemend ontwikkel in ’n skool van uitnemendheid waar norme en waardes voorrang kan geniet en waar elke ouer en leerder met trots kan sê: “Ons kinders is in die beste skool”. 'n Skool wat die belange van die Afrikaanse taal op die hart dra en getrou bly aan ons slagspreuk van "Waar potensiaal verwesenlik word".

Jan Stroebel

Skoolhoof