Die Mediasentrum trek gebruikers vanuit die breë spektrum van die Framesby familie. Daar is akademiese wonders en minder akademiese leerders, daar is stilles en minder stilles, soetes en minder soetes, nerds, wannabees en in-leerders, leiers en volgers, rekenaarfundi’s, boeklesers, sportiewes, kultuurdiere en grapmakers. Die meeste van die personeel verbonde aan die skool maak ook op verskeie maniere van die diens gebruik. Leerders en die personeel neem ook dikwels vir hul gesinslede storieboeke of vakliteratuur uit. Leerders soek dikwels vir broers of susters in ander skole inligting vir werkopdragte. Op hierdie manier bedien die Mediasentrum die wyer gemeenskap waarvan die skool deel is.

Daar is verskeie ensiklopedië op CD-ROM op die rekenaars gelaai, waarvan veral Encarta en Encyclopaedia Britannica baie nuttig is.

Daar is ‘n ikoon op elke rekenaar wat die L-Drive aandui. Dit is ‘n vorm van Intranet wat binne die Mediasentrum gebruik word en ‘n gemeenskaplike databasis, wat vanaf die Mediasentrumbestuurder se rekenaar gelaai word, op elke rekenaar beskikbaar stel.

Daar is vir elke vak ‘n lêer geskep, waarin klasnotas, vraestelle, ens. gelaai kan word. Drukwerk kan hiervandaan na ‘n rekenaardrukker of die fotokopieerder gemaak word. Daar is ‘n Algemene lêer met Internetadresse, ens., ‘n Mediasentrum-lêer en ‘n Vraestel-lêer. By sommige leerareas het van die personeel notas of toetsvraestelle en memorandums gegee wat gelaai moes word. Verder laai die Mediasentrumbestuurder die inligting.